y broses

Y cam cyntaf tuag at fod yn ofalwr maeth yw gwneud ymholiad cychwynnol. Cyn gynted ag y byddwch chi’n codi’r ffôn neu’n anfon e-bost atom ni, rydych chi ar y ffordd. Efallai fod y cam hwn yn ymddangos yn fach, ond mae’n anferth.
Byddwn yn cymryd eich holl fanylion er mwyn i ni allu dechrau deall eich sefyllfa. Byddwch chi hefyd yn cael pecyn sy’n rhoi mwy o wybodaeth am sut beth yw bod yn ofalwr maeth.

Ar ôl i chi gysylltu â ni, byddwn ni’n dechrau’r broses o ddod i’ch adnabod. Byddwn ni’n dechrau drwy gael sgwrs, wedi’i dilyn gan ymweliad cartref naill ai’n bersonol neu drwy alwad fideo. Ar y dechrau, mae’n bwysig ein bod ni’n ffurfio perthynas â chi – er mwyn deall pwy sy’n bwysig i chi a gweld eich cartref. Yna bydd rhywfaint o waith papur cychwynnol i’w wneud.

Rydyn ni’n cynnig cwrs hyfforddi ar-lein sy’n rhoi’r sgiliau a’r wybodaeth sydd eu hangen arnoch i chi. Mae’r cwrs hwn yn gyfeillgar ac yn anffurfiol, ac mae’n rhoi cyfle i chi gwrdd â thîm Maethu Cymru Sir y Fflint, yn ogystal â gofalwyr eraill yn yr ardal leol. 

"fe wnaethon ni gwrdd â llawer o bobl wych rydyn ni bellach yn eu hystyried yn ffrindiau ac rydyn ni’n helpu ac yn cefnogi ein gilydd pan fydd angen hynny arnon ni"

Yn ystod y cam asesu, byddwch chi’n dysgu beth fydd maethu yn ei olygu i chi. Er mai asesiad yw hwn, dydy hwn ddim yn brawf o bell ffordd. Mae’n gyfle i ni archwilio deinameg eich teulu ac yn gyfle i chi a’ch teulu ofyn unrhyw gwestiynau sydd gennych chi. Mae’r asesiadau, sy’n cael eu cynnal gan weithwyr cymdeithasol medrus, yn ystyried cryfderau a gwendidau eich uned deuluol.Mae’n ymwneud â pharatoi ar gyfer y manteision a’r heriau a allai godi wrth faethu.

Mae gan bob tîm Maethu Cymru banel, a dyma lle bydd eich asesiad yn cael ei ystyried. Mae’r panel yn cynnwys gweithwyr gofal cymdeithasol gwybodus a phrofiadol yn ogystal ag aelodau annibynnol. Maen nhw’n edrych ar bob darpar ofalwr maeth fel unigolyn.

Dim mater o roi golau coch neu wyrdd i’ch taith yw hyn. Bydd eich cais yn cael ei ystyried o bob ochr, a bydd argymhellion yn cael eu rhoi ynglŷn â beth fyddai’n gweithio orau i chi.

Ar ôl i’ch asesiad gael ei gymeradwyo, mae’r cytundeb gofal maeth yn nodi beth mae bod yn ofalwr maeth yn ei olygu. O’ch cyfrifoldebau dyddiol i’r cymorth a’r arweiniad ehangach y byddwch yn eu cynnig. Mae’r cytundeb hefyd yn cynnwys sut byddwn ni’n eich cefnogi chi – gyda’n harbenigedd a’n gwasanaethau.